Prinsen Veldjmuus sezoen 2019 oetgerópe

Veldjmuus geweldig oet de sjtartblök. 

Prins Kevin de eerste en jeugprins Romano de eerste oetgerope.  

In ein boemvol Moezepelies waerde zaoterdaag 5 jannewarie de nuuj veurgéngers van De Veldjmuus oetgerope. Eers waas ut de beurt aan jeugprins Romano de eerste en adjudant Giovano, ein prachtig duo die de jeug van De Veldjmuus zulle veurgaon. Romano en Giovano zeen beide 13 jaor. Det jeugprins Romano Aspers furore maakt in ut motorcross en grossiert in internationale titels is alom bekind. Daoveur is ziene sjpreuk ouch zeer toepasselik ‘fullspeed door ut Moezeriek’. Romano Aspers kump oet ein échte vastelaovesfemilie en is neet de eerste veurgénger in de femilietak. Nao ut ronke van de vastelaovesmotor waas ut tied veur de grote prins. As nuuje prins waerde Kevin de eerste oetgerope. Kevin is geine onbekinde biej De Veldjmuus. In diverse functies ging hae de Veldjmuus al veur en ut prinssjap is waal de kroon op  zien werk veur de Veldjmuus.  De dertigjäörige Kevin dae in ut Veldj is gebaore deilt ziene laeveswaeg mit Kim en is servicemonteur biej Carglass. Kevin haet ein bös vol miense diej um biejsjtaon. Maar zien veer adjudante sjtaon um ut dichtste biej en det zeen broor Jeremy Eikelenberg, Marcel Wijnands, Kenny Hendriks en Marco Janssen. Kevin geit De Veldjmuus veur mit zien laevesmotto ‘Gebroek dien sente veur sjoon memente!’.   

De Veldjmuus bringe de kómmende waeke maar leefs 10.000 Moezegezette róndj. In de Moezegezette meer euver ut pregram en ós veurgéngers. De Moezegezet is vanaaf volgende waek ouch digitaal te laeze. De link vindj geer vanaaf volgende waek biej de Veldjmuus op de site en op de fb pagina’s van diverse leeje van De Veldjmuus.