Beste Muuskes en anger vastelaovesvierders
Ich bin Yves Verkoulen en bin in mien elfde laevesjaor. Ich bin gebaore in Remunj en woonachtig in ut Donderbolriek. Mien hobby’s zeen boewe mit legosjtein en voetballe biej FC Roerdale in Melick.Ich zit in Melick op sjool in groep 6 van de Achbaan. Toen Michel Kerkvliet mich vroog of ich jeugprins van De Veldjmuus wohl waere waas mien anjwaord ‘liek mich supergaaf’. Dan begint ut veurbereije. Eine sjpreuk make, ein proclemasie in ein zitte, speldjes laote ontwerpe en laote make en eine adjudant zeuke.Ich had der driej op ut oug maar ich waas der sjnel oet. Ut waerde Dovani Fermont. Miene veldjwachter kammeraod Dovani höb ich via ein leuke kaart perseunlik gevraog en hae zei drék volmondig jao. Op 22 juni 2019 zeen veer de prinsewage al oet gaon zeuke en det waas dolle pret want ut waas nog midde in de zomer. Ut kin neet ederein zégke ein eige prinsewage. Sjnél kwame veer biej ein mit de rés van de veurgéngers en häör adjudante en secondante. Det waas eine superaovend. Ich höb de vastelaovend mit de paplaepel ingeveurd gekrege want mien mooder waas al wienkeuningin in ut jaor 2000 en mien tante Sandra waas secondante. 20 jaor later moog ich de Veldjmuus veurgaon as jeugprins en det vinj ich supergaaf. Mam en ouch oma Wilmie zeen Moezeprinses gewaes. Dus ut zit ‘ós in ut blood’ om ut mótto van wienkeuningin Kimberley te gebroeke. Veer boewe verder aan ein sjoon Moezetradisie.
Moog ich uch ein sjoon vastelaovessezoen winse,
Yves de eerste, jeugprins 2020, Ouch names miene adjudant Dovani.
